PR-G 184 Ruta da Lagoa da Lucenza
Trátase dunha ruta circular de media montaña, dentro do espazo Rede Natura dos Ancares-Courel, na que sairemos dos vales para chegar ata a alta montaña lucense. O percorrido iníciase na aldea de montaña de A Seara, e ascende polo val de Forgas, pasando polas fervenzas do Fócaro e de Navarega, ata chegar á Lagoa da Lucenza, de orixe glaciar e cuxa antigüidade se remonta ó plistoceno. Seguimos ascendendo ata a Campa da Lucenza, a uns 1500 m de altitude, e enlazamos cunha pista de terra que percorre a parte alta destas montañas. Ó chegar ás proximidades do Alto de Formigueiros, desviarémonos por un sendeiro que nos levará de volta á Seara pola outra ladeira do val de Forgas..
DISTANCIA / DURACIÓN
9,5 km /4 horas 20 minutos
ACCESOS
Dende Ourense pola N-120. Tomar a saída cara Quiroga. Dende alí, continuar pola LU-623 hata pasar Santa Cubicia e desviarse cara a LU-P-5001 dirección A Seara.
PERCORRIDO
A Seara, Lagoa da Lucenza, Campa da Lucenza, A Seara.
SINALIZACIÓN
Sinalización segundo a normativa de homologación da FGM. Existe un panel informativo no inicio da ruta. Marcas de pintura realizadas no 2015
PUNTOS DE INTERESE
- A Seara
- Fervenza do Fócaro
- Fervenza de Navaregas
- Lagoa da Lucenza
- Alto de Formigueiros
RECOMENDACIÓNS
Trátase dunha ruta de montaña, con nevaradas habituais durante o inverno, que require maior preparación e equipamento. Dende a pista de terra da parte superior, pódese visitar a Devesa da Rogueira, ainda que este desvío se atopa fora do trazado homologado.
